Ertu með til Jerúsalem árið 2016?

 

Á komandi hausti mun ég fara sem leiðsögumaður til Jerúsalem á vegum ferðaskrifstofunnar Vita. Nú í upphafi árs leitar hugurinn því þangað og hlakka ég mikið til. Í Jerúsalem sameinast fortíð og nútíð, tími og eilífð og verða eitt fremur en á nokkrum öðrum stað á jörðinni. Saga borgarinnar nær aftur í gráa forneskju. Hún var upphaflega reist fyrir þúsundum ára af þjóðum sem enginn kann skil á í dag. Á hverju götuhorni má greina nið aldanna. Milljónir pílagríma hafa lagt allt undir í tímans rás til að sækja Jerúsalem heim, eina helgustu borg þriggja heimstrúarbragða, gyðingdóms, kristni og íslam. Hjarta Jerúsalem er gamla borgin innan múranna, sem skiptist í borgarhverfi gyðinga, armena, kristinna og múslíma. Þar má finna Grátmúrinn, Grafarkirkjuna, Via Dolarosa og Al Aqsa moskuna á Musterishæðinni auk margra annarra helgistaða. Á fornum kortum var Jerúsalem staðsett í miðju heimsins. Um hana hefur verið barist oftar en flestar borgir. Hebrear, Fönikíumenn, Hellenar, Egyptar, Babýlóníumenn, Assýringar, Rómverjar, Býsantíumenn, Arabar, Mongólar, Krossfarar, Ottómanar, Bretar, Frakkar og ótal fleiri hafa tekist á um hina helgu múra borgarinnar. Enn er deilt um borgina. Um leið er Jerúsalem tákn vonar og friðar og betri heims, tákn sem sameinar mannkyn um æðri gildi. Hér má finna stórkostleg söfn, sýnagógur, kirkjur, moskur og aðrar frægar byggingar fortíðarinnar. En hér knýr líka nútíminn dyra með nýlistasöfnum, tónlist, mörkuðum og spennandi matargerðarlist. Að sækja Jerúsalem heim er einstök upplifun sem enginn ætti að láta framhjá sér fara.

 

Athugasemdir

[Jón Þórhallsson, 2.1.2016 kl. 16:55]

Er eitthvað að sækja þangað?

Í Matteusar-guðspjalli 21:43. Segir Jesú Kristur við gyðinga:

"Guðsríki verður frá yður tekið og GEFIÐ ÞEIRRI ÞJÓРER BER ÁVEXTI ÞESS" (Íslandi). 

http://thjodarskutan.blog.is/blog/thjodarskutan/entry/1401114/